2 POEM-"Change in my place of BIRTH".

“ME HOME LAND.”© 2011-10-24

L. E. FRANKLIN B. F. A Hons.

B G, GUYANA, G T, de mud, or birth-place

Me na know de place me born in no more

De place so change dat me lef in wan dream.

Fo three week me a ask nuff question but de place

Place from me past an get cold shoulder an suck teeth

Mek me stop talk cause dem mek me feel so stupid

An stop lookin’ fo answer in de present an forget de long past.

Me go ome an hardly know where me da most of de time

Me walk-round an round an na know nothing no more

Most of de streets got de same names but de place change

All of de buildin’ dat me lookin’ fa not still standin’-up no more.

De favourite place me use fa hang-round na ave no buildin’ now

But lef empty now wid nuff wild grass growin’ pun de open spot

De place more busy dan in de past wid nuff people an vehicles

In wan real hurry fightin’ fa de same space pun de same road.

All of dem sidewalks full wid nuff venders sellin’ de same stuff

Can’t understand dem hustle fo survive an how dem mak money.

Dem good streets an pavements now break-up wid nuff pot-holes

De sidewalks at nights an day dat wid nuff people mek bed fa sleep.

Me only had fo use me eye an keep me mouth lock-up tight-tight

So na fo look like wan stupidee in wan new place an let de past in de past

But me got fa sa dat me really can’t tek it an me belly full wid nuff pain

Feelin’ sad fa true, wid eye-water in me eye in de place me love an born dat gone. 

“YO WANT DE TRUTH BUT YO CAN’T HANDLE IT.”© 2011-10-24

L. E. FRANKLIN B. F. A Hons.

Afta me walk round like if me sleep walkin’ fo some time

Ne belly ma stop hurtin’

Wid tears in me eye

An me want fa ball-out

Cause me belly hurtin bout de place dat really change

So far from what me lef

An know dat me own people now total stranger to me

Cause me now stranger to dem too

An dem ave

No fate in one nada an

No respect

 No more trust an

No order in de place too

Everybody want wan small piece

An now everythin’ yo want

Yo got fo pass was handout wid de right hand too.

Duns-eye

Malalee

Bread,

Dustie

Chit-na

An greens

Fo any service now dat was free in de past.

Now me really bitter-bitter fo so

An me feel de taste in my mouth now fo true.

Me really got fo keep me past in me

An na bring it out again fo look like me mad

Me got fo put it in me memory

But all de wrong still keep knockin’ me out inside me brain.

Some of dem government buildin’

From long-long time look de same an no repair

Me think dem European buildin’ so dam strong

An got nuff info fo keep dat it na burn-down yet.

De one dem can destroy easy dem dun destroy already

Or break-down de one dem can an put-up new one in it place

Dem also let Christian churches burn-down

An de one dem lef fo stan an rotten dem mak sale fo it in GT to wan foreign owner.

It is wan shame how nuff foreigner land in de place

An buyin’up all dem old historical buildin’ in place an de rulers na care bout we past

Is it dat time change in de place?

Or dem change de place fo dem own new likin, now?

De place full wid foreigners takin’ over so easy over dem own people wid no fight to own

One group leadin’ got nuff money more dan dem own

An gettin’ power handed to dem plus what dem come wid

So it mek thin’ very easy fo dem tek what dem want.

De other group come wid no money

But mek money sellin’ booze and cook food

An now break ground an start too buyin’ what dem want wid out fear.

Nobody in dem way cause dem tekin’ de people small piece

An givin’ dem dem needs fo survive in de place.

Dem really tekin’-over de place street by street startin’

From de west to de east

Dem start wid Robb an Regent Street dat full wid foreigners sellin’ wha Guyanese want.

Wid all de money dem hide an get a pass-in

Wid no problem an getting’ comfortable wid help from dem in-charge.

Wid wan hidden agenda

It help dam put more in some body pocket

But dat gon start wan economic war in de place not by de poor

But by dem dat had wan chance before de foreigners but can’t mek more now.

Between dem who ruler an don’t care

But de foreigner dem dat fullin’-up de place wid cheep good

Dat keep sellin’ an rippin-off dem own people.

De place so change dat dem got wan four story mall

Not far from Water Street me hear own by we people.

All dis happenin’ in front of the money people

Who always got fo so an dem losin’ power but still attachin’

De poor in de place fo so

Wha a worry me is dat de poor people

Na mean fo wake-up an learn no more from de past mistakes.

But still helpin’ de rich get more rich an dem stayin’ real poor all over de place

An dem even makin’-up False charge an lockin’-up dem own

All fo wan small hand-out from dem in control

As Judas did Christ in de Holy Bible story dem did give we fo read.

Me can’t stand it an me can’t take it no more

Cause me belly na really stop hurtin’ me now all de time in de place me born.

Yo can’t trust yo own now in dis unjust society

An yo na ave fo trust wha me sa is true but go see place of yo birth fo true.